t Gevuil 18 nov 2017

1

Gevuilens

Toun ik zovèr was vruig ik moeke, woar kommen de kinder aigenleks vandoan. 'Oet Slochterbos' zee ze, hou kommen ze din hier 'mit n ooievoar.' Nou din bin je weer n zètje rustig. Wie reden der wel ais langs mor ik zag nooit gain kinder in dat bos. Ik vruig din moeke woar binnen dij kinder, din zee opoe dij achterin zat “t binnen net wilde dairen, je wait dat ze der binnen mor je zait ze nooit.”

Ik spailde mit n joar of 10-11-12 aal doagen boeten mit jongs oet t dörp. Voetballen appeltjes gappen, boomke klimmen totdat Tjoam mien kameroad in kop kreeg doktertje speulen. Din mozzen we eerst n slachtoffer vinden, altied wichter dij mozzen din onderzöcht worren. Stofjas aan veur as je n stofnust tegenkwammen en mit zo'n zoegnapke onderzuiken. Dee nait zeer mor t kriebelde wel zeden wichter en din n seconde opinium deur mien kameroad Tjoam. t Haar aigenleks niks om t lief, je werden der nait aans om, t kostte allint mor tied.

Ik begon mie op n gegeven moment zörgen te mokken over mien lichoam, der gebeurden zoaken woar ik gain stuur over haar. Ik dreumde wel ais en din was mien pyamabroek nat. Moeke haar t over duustere gevuilens...natte dreumen...Ik docht as mie dat mor nait èlke nacht overkomt, mor t ging goud. Ik dreumde nog wel ais moar dat waren din dreuge dreumen. Jongs in t dörp haren wel ais t zulfde beleefd, haren t ook over duustere gevuilens.

Het bleef laange tied rustig totdat ik hail touvalleg tiedens boomke klimmen gevuilens kreeg...Ik docht t zollen toch gain duustere gevuilens wezen kon t ook nait omschrieven. Ik noar moeke tou ik zee ik heb gevuilens bie t boomke klimmen. Das hail normoal zee moeke mor vertèld mor genain...dus toch duustere gevuilens?

Dat joar was der gain boom vaileg veur mie, t kon ook nait bie èlke boom. n Boom mit takken din kreeg ik dat gevuil nait, t mos n rechte boom wezen. k Hebt ook veur mie zulms hollen want t waren duustere gevuilens, veur zeker. As k ter nou over noadenk was ik in dij tied n boomofiel.

Jongs in Faarmsom gingen op n gegeven moment zoaterdsoavonds noar Delfziel achter vrouwlu aan, woarom? “Joa” zegt mien kameroad “dat zegt joen gevuil.”

Je mozzen joe eerst hemmeln, schoon hemd, vlinderstrik en n pofboxem aan, veur joen gevuil mozzen je dat doun. Wichter waren der mainstied al en din mos je doar achteraan lopen, aal rondjes lopen achter vraauwlu aan. Maarktstroat ...din òle schans, landstroat, poststroatje en din begon t weer op nijs. Ik docht wel ais as ze mor nait begunnen te runnen... din run je achter de vraauwlu aan, dat mog nait van Moeke.

Ik zee tegen mien kameroad woar kiek je din aal noar,

“noar de bainen” zee der, ik zeg wat zugst din doar aan...nou... of ze dunne bainen hebben of dikke bainen.
Ik zeg wat is din de ganboare bain...nait te dik en nait te dun vanzulms. "Je hebt wel ais dat ter aine is mit haile mooie bainen" zee è... "mor din het ze weer n lèlke kop." Der was ook n jong dij zee je mozzen noar enkels kieken. Der binnen haile laange enkels en körte enkels. Ik keek toun wel ais noar mien muike Trijntje dij haar apmoal gain enkels dat was ain en aal bain, bain ging zo schoun in. Ik von dat achter de vraauwlu aan mor niks het kon nait in schaa stoan mit boomke klimmen.

Nou... de joaren verstreken n beetje fatsounlijke kerel mos op dansles. Ze proaten der nait over mor òlen waiten wel dat je din opzoadelt worren mit gevuilens woar je gain wait van hebben. Wichter zaten din in lange rieg aan aine kaant van zoal en jongs aan aander kaant. As dij meester ruip din vlogen de jongs op de wichter oaf, ik was altied te loat en kreeg din dat rötwicht van Gernoat.

Laid Daansen

Wat n toustand. As t nait noar t zin was mozzen je dichter tegen t wicht aan stoan, ik was der as de dood veur denn moeke haar wel ais zegt...blief der nait aan plakken. Ik kreeg gain dij gevuilens dij ik tiedens boomke klimmen haar.

Wat je ook deden je kwammen altied in aanroaken mit wichter en vanzulms mit gevuil. Wichter en gevuil dat heurde biemekoar, kop kin joe der bie omlopen, kop ter bie hollen aans loop je as n kip zunder kop achter zo'n wicht aan.

Ik kwam mit joar of 15 bie meziek, kwam in n dans-orkestje. Meziek von k schier...mor ja... op zo'n dans-oavond wor je weer oaflaaid, zègt dij noast joe staait onder t meziek moaken...”Moust es kieken wat schier mokkeltje.”

Wichter haitnde vanoaf dij tied mokkeltje. Noa tied as t daansen oaflopen was runden de muzikanten noar boeten achter de mokkeltjes aan, ik ook... wat mout je aans je gonnen mit de meute mit. t Waren tounderstied apmoal fietsen dij tot schuur oet kwammen auto's waren der tounderstied hoast nait. Ik zeg tegen trompetist hou versier je nou n mokkeltje. Hai zegt “gewoon van fiets oafrieten.”..nou dat ging me te vèr.

n Week loater mossen we weer speulen en der wer n wienkeunegin oetkozen. Èlk kwam der op oaf...Dij kastelain zee as joe muzikanten nou even in n poar keer de mokkeltjes rondjes lotten draaien en n schier mokkeltje oetkaizen din wordt dij wienkeunegin.

De trompetist haar veul meer ervoarens as ik en zee as stoe nou dij oetkaist din hest heur ook zo versierd. Ik doch nou mout ik ter bie wezen je willen joe ook nait kennen lotten en joa è...k haar beet.

Dancing Stoalstroa in Haakstede ston bekend om zien schiere speultoen. Ik docht hup mit t wicht speultoen in mor din mos je eerst langs n rieg lachspaigels nou we hebben wat oaflacht...k was dood zenuwachteg...Ik docht wat mout ik straks mit t wicht in speultoen. Ik wol ja ook nait aan heur plakken blieven...woar blief je din...Nou we hebben wat oafspeult in speultoen, van t aine apperoat in t aander apperoat...Nou wait ik wat dij gevuilens binnen.

Tammo oet Wolndörp